Danh sách lưu học sinh campuchia thái bình
Học đi đôi với hành
កាលវិភាគប្រលងសងសម្រាប់វិសម្សកាលរដូវក្តៅ
អ្នកដែលទន្ទឹងរង់ចាំនូវកាលវិភាគប្រលងសងសម្រាប់វិសម្សកាលឆ្នាំ២០១៣ ២០១៤ ឥលូវកាលវិភាគត្រូវបានសាលាបញ្ចេញអោយដឹងហើយ ។ សាកលវិទ្យាល័យតម្រូវអោយនិស្សិតដែលធ្លាក់មុខវិជ្ជាទាំងអស់ ប្រលងមុនថ្ងៃចូលឆ្នាំសិក្សាថ្មីរយៈពេលមួយអាទិត្យ គឺចាប់ពីថ្ងៃទី ១៣ ខែកក្កដា ឆ្នាំ ២០១៤ លើកលែងមុខវិជ្ជាកីឡា តម្រូវអោយប្រលងនៅថ្ងៃទី ២៦ ខែមិថុនា ។ កាលវិភាគនេះ មានប្រយោជន៍ដល់បងប្អូនយើងដែលមានបញ្ហាធ្លាក់ច្រើនមុខតែចង់ទៅលេងស្រុកកំណើត ។ វាជួយយើងអោយរៀបចំពេលវេលាក្នុងការធ្វើដំណើរ ថាត្រូវកំណត់ថ្ងៃចេញដំណើរ និងថ្ងៃត្រលប់មកវិញ ។ លើសពីនេះទៅទៀតត្រូវរៀបចំ ពេលវេលាសម្រាប់ត្រៀមប្រលងសង ។
ឃើញថាមុខវិជ្ជាពិតជាលំបាកច្រើន តួយ៉ាងដូចខ្ញុំកំពុងរៀនឆ្នាំទី៣ មានមុខវិជ្ជាច្រើនហើយ ភាគច្រើនជាមុខវិជ្ជាពិបាក ដូចជាឱសថ និងចិត្តវិទ្យា ។ ខ្ញុំត្រូវនៅវៀតណាម ដោយមិនបានត្រលប់ទៅលេងស្រុកកំនើតទេ ។
ជូនពរបងៗឆ្នាំទី៦ ដែលបានប្រលងបញ្ចប់ការសិក្សាហើយថ្មីៗ និងបងប្អូននិស្សិតខ្មែរយើងគ្រប់ជំនាន់ទាំងនៅថៃប៊ិញ ទាំងនៅសាកលវិទ្យាល័យផ្សេងៗ ក្នុងប្រទេសវៀតណាម ធ្វើដំណើរត្រលប់ទៅលេងស្រុកកំណើត ប្រកបដោយសុវត្ថិភាព និងភាពសប្បាយរីករាយជាមួយក្រុងគ្រួសារ ។
សូមអរគុណ !
ឃិន សំណាង
និស្សិតជំនាន់ទី៤៣ម្នាក់បានបាត់កង់របស់ខ្លួន
កាលពីវេលាម៉ោងប្រមាណ១១យប់ថ្ងៃទី ១៣ខែមិថុនាឆ្នាំ២០១៤ នេះ មានប្អូននិស្សិតខ្មែរយើងម្នាក់បានសរសេរ Status មួយ ដែលរៀបរាប់ពីការបាត់កង់របស់គេ ។ តាមរយៈ Status សរសេរក្នុងក្រុមនិស្សិតខ្មែរដែលរៀននៅថៃប៊ិញ បានអោយដឹងថា និស្សិត ស៊ីដា បានជួបបញ្ហាបាត់កង់ រហូតមកដល់ថ្ងៃសរសេរ Status គឺមានរយៈពេល ២ថ្ងៃមកហើយ ។ ដោយសារមានការបារម្ភពេក ស៊ីដាបានសរសេរឡើងក្នុងគោលបំណងសុំមតិយោបល់ពីសិស្សច្បង ដើម្បីដោះស្រាយបញ្ហានេះ ។
យោងតាម Comment របស់សិស្សច្បងទាំងអស់ មានមួយចំនួនបានសរសេរថា អោយស៊ីដាសរសេរជាពាក្យស្នើរដល់បន្ទប់គ្រប់គ្រងនិស្សិតដែលទទួលបន្ទុកលើកន្លែងផ្ញើកង់ម៉ូតូ រៀបរាប់ពីការបាត់កង់នោះ បញ្ជាក់អោយច្បាស់ពីបញ្ហា ។ ដោយសារការគ្រប់គ្រងកង់នៅក្នុងអន្តេវាសិកដ្ឋាននៅមានលក្ខណៈរញ៉ែរញ៉ៃ អ្នកណាក៏អាចយកកង់អ្នកផ្សេងប្រើបានដោយមិនចាំបាច់ប្រើប្រាស់សំបុត្រកង់ ។ នេះជាបញ្ហាដែលអាចអោយអ្នកផ្សេងចូលមកយកកង់ជិះបានយ៉ាងងាយ ។ លើ Comment នោះក៏មានសរសេរដែរថា ក្រែងមានមិត្តភក្តិគេយកជិះសិន ។ ចំណែកឯបងប្រធានសមាគមន៍និស្សិត រី បូរិន និស្សិតជំនាន់ទី៤០ ក៏បានចេញមុខដោះស្រាយអំពីបញ្ហានេះដែរ ។ នេះបញ្ជាក់ពីការយកចិត្តទុកដាក់ពីសិស្សច្បងក៏ដូចជាប្រធានសមាគមន៍លើសិស្សប្អូន ។ មួយវិញទៀតក៏ស្តែងអោយឃើញពីការសម្តែងនូវរាល់បញ្ហាដែលបានជួបដល់សមាគមន៍យើង ។
មកដល់រសៀលម្សិលមិញ ស៊ីដាបានបញ្ជាក់វិញថា តាហ័រអ្នកគ្រប់គ្រងនៅកន្លែងផ្ញើកង់បានផ្តល់មកវិញនូវកង់ចាស់មួយ ដែលអាចប្រើប្រាស់បាន ។ ចំណែកកង់ដែលបានបាត់គឺ នៅកំពុងតាមដានបន្ត ។ នេះជាបទពិសោធន៍មួួយសម្រាប់បងប្អូននិស្សិតខ្មែរយើង គួរតែចាក់សោកង់ម៉ូតូជានិច្ច ។
សូមអរគុណ !
ឃិន សំណាង
ពិធីជប់លៀងអបអរសាទរការប្រលងបញ្ចប់ការសិក្សារបស់និស្សិតជំនាន់ទី៣៨
ការសិក្សារយៈពេល៦ឆ្នាំរបស់បងៗនិស្សិតឆ្នាំទី៦ ជំនាន់ទី៣៨ នៃសាកលវិទ្យាល័យវេជ្ជសាស្ត្រនិងឱសថសាស្ត្រថៃប៊ិញត្រូវបានបញ្ចប់ដោយស្នាមញញឹមគ្រប់ៗគ្នា ។ ទិដ្ឋភាពនៃភាពសប្បាយរីករាយរបស់បងៗបានធ្វើអោយប្អូនៗ ទទួលបាននូវភាពជឿជាក់និងខិតខំប្រឹងប្រែងតាមដើម្បីសម្រេចបំណងដែលខ្លួនបានប៉ង តាំងពីឈានជើងចូលមករៀននៅសាកលវិទ្យាល័យមួយនេះ ។ ថ្ងៃនេះ ជាថ្ងៃល្អ ដែលបងៗឆ្នាំទី៦ ជំនាន់ទី៣៨ ពួកគាត់បានរៀបចំនៅកម្មវិធីជប់លៀងលាគ្នាដល់ខ្ញុំជាសិស្សប្អូន ជំនាន់ក្រោយៗ ដែលពិធីជប់លៀងនេះ ឆ្នាំណាក៏មាន ។ ប៉ុន្តែសម្រាប់ឆ្នាំនេះ ខ្ញុំឃើញមានលក្ខណៈធំដុំជាងមុន ហើយសប្បាយរីករាយជាងមុនដែលខ្ញុំមិនធ្លាប់បានឃើញ ។ បងៗបានចូលលុយគ្នាម្នាក់បន្តិចៗ ដើម្បីចូលរួមសប្បាយរីករាយជាមួយប្អូនៗ ។ មានម្ហូបអាហារឆ្ងាញ់ៗ ផ្លែឈើ ទឹកក្រូច និងស្រាបៀរផងដែរ ញ៉ាំងអោយពិធីជប់លៀងមានបរិយាកាសកាន់តែអ៊ូអរ សប្បាយរីករាយ ហ៊ូរកញ្ជៀវពេញបន្ទប់ ។ បងប្អូននិស្សិតគ្រប់ជំនាន់ផ្តុំគ្នាតាមជំនាន់ ក៏ដូចជាឆ្លាស់ជំនាន់ ញ៉ាំអាហារប្រកបដោយទឹកមុខញញឹមស្រស់ស្រាយ និងលើកកែវជូនពរដល់សិស្សច្បងដែលបានបញ្ចប់ការសិក្សាដោយលទ្ធផលជាទីគាប់ចិត្ត ។
ជំនួសអោយបងប្អូនទាំងអស់ ខ្ញុំបាទ សូមជូនពរដល់សិស្សច្បងទាំងអស់ ក្រោយពីបញ្ចប់ការសិក្សារយៈពេល៦ឆ្នាំ បងៗត្រលប់ទៅក្លាយជាវេជ្ជបណ្ឌិតម្នាក់ដែលពូកែ មានការងារល្អទៅតាមមន្ទីរពេទ្យធំៗ ជាពិសេសគឺទទួលបានប្រាក់ខែខ្ពស់ជាទីពេញចិត្ត ។ លើសពីនេះ ខ្ញុំសូមជូនពរបងក្នុងការធ្វើដំណើរត្រលប់ទៅស្រុកកំណើត ប្រកបដោយសុវត្ថិភាព សេចក្តីសុខចម្រើន និងជ័យជំនះគ្រប់ ពេលវេលា គ្រប់ទីកន្លែង ។
ពិធីជប់លៀងត្រូវបានប្រារព្ធតាំងពីម៉ោង៥ រហូតដល់ម៉ោង១១យប់នេះ ទើបបញ្ចប់ ។ មានការចូលរួមជាពិសេសផងដែរពីមិត្តភក្តិ បងប្អូនខ្មែរយើង ដែលកំពុងសិក្សានៅរដ្ឋធានីហាណូយ ទាំងបងប្អូនរៀនថ្នាក់បរិញ្ញាប័ត្រ អនុបណ្ឌិត និងបណ្ឌិតផងដែរ ។ ទិដ្ឋភាពយប់នេះ ពិតជាមិនអាចបំភ្លេចបាន នូវសាមគ្គីដ៏ល្អ របស់បងប្អូននិស្សិតខ្មែរដែលកំពុងសិក្សានៅក្រៅប្រទេស ។ ទោះជានៅឆ្ងាយពីគ្រួសារ ក៏មានបងប្អូនខ្មែរជាច្រើនទៀត នៅស្វាគមន៍រាប់អានដោយទឹកចិត្តស្មោះត្រង់ ភក្តី និងសាមគ្គីរីករាយ ។
ក្នុងពិធីនេះ ផងដែរ ខ្ញុំបានថតរូបបានមួយចំនួន តែមិនសូវជាច្រើនទេ ហើយក៏មិនបានច្បាស់ល្អដែរ ។ មូលហេតុនោះ គឺដោយសារបងប្អូនយើងកំពុងសប្បាយរីករាយ ធ្វើអោយរូបព្រិល និងថតពេលយប់ ។ បើបងប្អូនណាចង់មើលរូប សូមចូលទៅកាន់ ទំព័រ ហ្វេសប៊ុក LHS CPC Thái Bình ហើយចូលទៅកាន់ អាល់ប៊ុម រូបថត ។ កុំភ្លេចចុច Like ម្នាក់មួយផង ដើម្បីដឹងព័ត៌មាននានា ពីសមាគមន៍និស្សិតខ្មែរនៅថៃប៊ិញ ។
ចំណែកវីដេអូសម្រាប់ថ្ងៃនេះ ខ្ញុំកំពុង Upload ឡើងលើ Youtube របស់ខ្ញុំហើយ ។ បងប្អូនចូលទៅកាន់ Channel Youtube របស់ខ្ញុំដែលមានឈ្មោះ KHIN Samnang បន្ទាប់មកចុច Subscribe ផង ដើម្បីក្រោយពីពេលខ្ញុំ Upload ហើយ វានឹងបង្ហាញអោយបងប្អូនបានមើល ។
សូមអរគុណបងប្អូននិស្សិតទាំងអស់!
ឃិន សំណាង
និស្សិតឆ្នាំទី៣ សាកលវិទ្យាល័យវេជ្ជសាស្ត្រនិងឱសថសាស្ត្រថៃប៊ិញ
Subscribe to:
Posts (Atom)
